O pleno votará o acordo definitivo de reversión da cesión de dúas parcelas cedidas ao IGVS
· Celébrase a sesión o martes 3 de xuño por ter cadrado o último xoves do mes de maio en festivo local
A corporación teense reúnese este martes 3 de xuño para realizar a sesión ordinaria do pasado mes de maio. Ó coincidir o último xoves de mes co festivo local trasladouse a data da sesión para mañá martes. O debate terá lugar, como xa é habitual, en horario de tarde, ás 20:00 horas, para facilitar a asistencia das persoas interesadas e celebrarase no salón de sesións da Casa Consistorial, na Ramallosa. A sesión tamén se retransmitirá por streaming a través da web municipal, premendo no banner En directo, na marxe dereita da portada.
No sesión votarase o acordo definitivo de reversión de dúas fincas ao IGVS. No pleno de marzo iniciouse o procedemento de recuperación dunha finca en Galanas-Balcaide cedida á Xunta para a construcción dun centro de día e vivendas de promoción pública no ano 2007, que nunca se chegou a executar. No pleno de abril aprobouse o inicio de recuperación doutra parcela en Calo, no Camiño de Texexe número 2, que o Concello cedeu no ano 1998 para vivendas de protección oficial, que tampouco se realizaron. Unha vez feitos os trámites pertinentes de audiencia ao propio IGVS no acordo que se leva a pleno mañá apróbase a recuperación definitiva das fincas e a súa incorporación de novo ó patrimonio municipal.
Na sesión tamén se debaterá unha moción do BNG na que se denuncia o atraso na tramitación de novas axudas RISGA.
A orde do día ten os seguintes puntos:
- Aprobación das actas das sesións do 24.04.2014 e 29.04.2014.
- Dar conta das resolucións da alcaldía (da 258/14 á 367/14).
- Dar conta do informe de avaliación do 1º trimestre de 2014.
- Ditame da proposta da alcaldía de acordo definitivo de reversión das cesións gratuítas ao IGVS da parcela do SUD-12 (para construción do centro de día e vivendas de protección en réxime de aluguer) e da parcela nº 1117 do polígono 10 do PXCP de Calo (para construción de vivendas de protección oficial).
- Ditame da moción do grupo municipal do BNG para denunciar o atraso na tramitación de novas axudas RISGA.
- Mocións.
- Rogos e preguntas.
Ningún comentario:
Publicar un comentario