BNG A Estrada - Demanda de dimisión do alcalde e da Secretaria Xeral de Urbanismo

Así como esiximos a dimisión do alcalde, esiximos tamén a dimisión da secretaría xeral de urbanismo por levar a Estrada á idade de pedra

Hoxe xoves o deputado do BNG, Daniel Rodas, interpelará a Secretaria Xeral do Territorio e Urbanismo sobre o PXOM da Estrada

hoxe a Secretaria Xeral do Territorio e Urbanismo, Encarnación Rivas Díaz, responderá as preguntas rexistradas polos deputados do BNG, Ana Belén Pontón e Daniel Rodas, a respecto do PXOM da Estrada, suspendido cautelarmente polo Tribunal Superior de Xustiza de Galiza desde o pasado mes de abril.

Xosé Magariños explicou que “os deputados do BNG esixirán responsabilidades e dimisións polo dano causado á Estrada, porque neste asunto, tanta responsabilidade ten o alcalde e os seus concelleiros por aprobar un Plan, cuxas modificacións excedían con moito a meras alteracións puntuais, como a Xunta de Galiza, que dá o visto e prace a un PXOM que debía cumprir a lei escrupulosamente antes de ser aprobado definitivamente”.

O concelleiro nacionalista afirmou que “xa dixemos en varias ocasións aquí houbo un acordo entre o alcalde e a Xunta do Partido Popular para usar o urbanismo da Estrada como arma política primeiro contra o bipartito local e logo para apuntarse un tanto de cara as eleccións municipais do vindeiro ano”. “Neste sentido”, explicou Magariños, “temos que recordar que o informe da secretaría municipal foi feito por unha militante do PP da Estrada, en substitución do secretario titular de vacacións forzosas para que este departamento ditaminara un PXOM á medida dos intereses políticos do alcalde”.

“Mais quen paga as consecuencias son os veciños e veciñas da Estrada”, engadiu Magariños, “que ven unha vez máis como o urbanismo da Estrada retrocede as normas subsidiarias de 1978, devolvendo a lei da selva á vila e paralizando por completo a construción no rural”. “E isto”, engadiu o concelleiro nacionalista, “paralizará máis aínda a economía local, veremos aumentar o paro no noso concello, veremos como empresas que tiñan proxectado ampliar os seus negocios, marchan por falta de solo industrial, veremos como este concello segue no burato no que leva metido desde hai décadas”.

Xosé Magariños afirmou que “non agardamos milagres da Secretaría Xeral do Territorio e Urbanismo e moito menos que asuma responsabilidades dunha persoa que está imputada nunha causa xudicial en Sanxenxo, tamén co urbanismo de fondo”.

“Así como o alcalde bota balóns fóra, como se con el non fora a cousa”, denunciou Magariños, “é de agardar que a secretaria xeral faga o propio e se desentenda da tramitación do PXOM da Estrada como xa nos ten acostumados o Partido Popular e os seus representantes públicos”.

“Mais xa abonda”, afirmou o concelleiro do BNG, “cos intereses da Estrada non se xoga, e así como esiximos a dimisión do alcalde, esiximos tamén a dimisión da secretaría xeral de urbanismo por levar a Estrada á idade de pedra”.

Ningún comentario: