MANUEL MIRÁS RETOMA ESTE DOMINGO OS
“ENCONTROS CO ALCALDE”, RESPONDENDO ÁS PREGUNTAS DOS VECIÑOS DE CARDAMA E
MARZOA
As citas terá lugar este domingo 6 de maio, ás 11:30 horas
no atrio da igrexa de Cardama e ás 16.30 horas no local social de Marzoa
2 de maio de 2012.- O alcalde de Oroso, Manuel Mirás Franqueira, retomará este
domingo 6 de maio os “Encontros co alcalde” cunha dobre cita nas parroquias de
Cardama e Marzoa. O primeiro edil orosán amósase moi satisfeito co
desenvolvemento da primeira cita, celebrada o pasado mes de abril en Trasmonte,
xa que “é bo que a xente saiba o que facemos e poida preguntarnos e
transmitirnos as súas inquedanzas e dúbidas. Nós non temos vergoña de dar a
cara e de falar da nosa xestión diante dos veciños de Oroso, non como outros
que lles torcen a cara unha vez pasadas as eleccións”.
Por iso, Mirás Franqueira confirma que “os encontros van
continuar, aínda que non sexa cun calendario estricto, pois o que se busca é
poder dialogar cos veciños, intercambiar opinións, coñecer as súas propostas e
ideas nun ambiente máis cercano a eles e lonxe da formalidade que pode ter unha
visita á Casa do Concello”.
O primeiro dos encontros deste domingo 6 de maio terá
lugar ás 11:30 horas no atrio da igrexa de Cardama (no caso de choiva, a
reunión trasladaríase ata o local social de Cardama, situado xusto enfronte).
No caso de Marzoa, a cita será ás 16:30 horas no local social da parroquia. En
ambos casos, Manuel Mirás fará unha primeira intervención na que dará a coñecer
aos veciños as xestións realizadas ata o momento, especialmente nas súas
respectivas parroquias, e despois responderá ás preguntas e dúbidas dos
asistentes.
Ningún comentario:
Publicar un comentario