Santiago,
08/07/2016 - Francisco Rivadulla,
investigador no Centro Singular de Investigación en Química Biolóxica e
Materiais Moleculares da USC (CiQUS) acaba
de ser recoñecido cunha das axudas PoC–Proof of Concept (Proba de Concepto) que concede o
Consello Europeo da Investigación (European Research Council - ERC). Dotadas
con 150.000 euros, a misión principal destas axudas é contribuír a salvar a
brecha entre a investigación básica e o mercado, servindo de impulso nas
primeiras fases de comercialización dun produto innovador.
A
iniciativa premiada, coñecida como ANTS (A New Technology of microthermal
Sensing for application in microcalorimetry) conseguiu entrar na lista
definitiva xunto a outros 43 seleccionados en toda Europa (5 de España) cun enfoque
fundamental que emana dos resultados de investigación obtidos polo investigador
da USC no marco do proxecto Starting Grant 2DTHERMS (Termoeléctricos
Baseados en Nanoestructuras 2D de Óxidos), financiado igualmente polo ERC en
2010 cun millón e medio de euros.
ANTS
O obxectivo
de ANTS é desenvolver un novo tipo de microsensor de temperatura de alta
resolución temporal e espacial, baseado nun efecto magnetotérmico. Segundo
explica o profesor Rivadulla, “as primeiras medidas xa permitiron determinar
diferenzas de temperatura da orde dunha millonésima de grao a través de
películas delgadas duns poucos nanómetros de espesor”. Agora “o que nos propoñemos
con este proxecto é utilizar esta resposta eléctrica como un sensor térmico
ultrasensible”.
Un
aspecto de especial relevancia nesta proposta é que os elementos activos de
detección están feitos dun único material, o que ofrece vantaxes importantes
para a miniaturización cando se compara cos módulos Peltier clásicos que se
utilizan na actualidade. Por outra parte, contan co valor engadido de que son
fáciles de fabricar cos medios de deposición química tradicionais, así como a
través doutros procedementos fotolitográficos estándar xa dispoñibles.
Ao longo
do novo proxecto PoC-Proba de Concepto, os investigadores tratarán de optimizar
esta resposta e deseñar un sistema capaz de medir variacións de temperatura moi
pequenas –como as producidas nalgunhas reaccións químicas-, cunha boa
resolución espacial e temporal. “O obxectivo é demostrar a viabilidade dun novo
microsensor térmico para a súa aplicación nunha nova xeración de
microcalorímetros, indo máis alá da tecnoloxía dispoñible a día de hoxe e mellorando
enormemente a súa resolución térmica, temporal e espacial”, afirma Rivadulla.
O
dispositivo proposto por ANTS pretende achegar unha ferramenta cuantitativa
para determinar con maior precisión a enerxía involucrada en distintos
procesos, o que permitirá a súa aplicación en múltiples áreas, dende o ámbito
da catálise ata o estudo de interrelacións biolóxicas de interese como a
interacción proteína-proteína ou ADN-proteína.
Coa
concesión de esta Proof of Concept, el ERC confirma su aposta pola actividade
científica da USC e as liñas de investigación de alto risco, financiando proxectos
na fronteira do coñecemento co obxectivo de que permitan abrir novas ou
inesperadas oportunidades de aplicación a nivel social e comercial.
Ningún comentario:
Publicar un comentario