Daria Esteva visita NUMAX este sábado para acompañar a estrea de 'Lejos de los árboles'
Este sábado 9 de maio ás 20:00 teremos connosco a Daria Esteva. Daria viaxa a NUMAX desde Barcelona para presentar a copia en DCP 2K da versión remontada por Pere Portabella en 2011 de Lejos de los árboles, dirixida entre 1966 e 1972 polo seu pai, Jacinto Esteva. A copia que estreamos en NUMAX proxéctase por primeira vez en DCP 2K, logo do seu percorrido por filmotecas e centros de arte desde 2011 en 35mm. e Blu-ray, nunha copia elaborada expresamente para a súa exhibición na nosa sala.
En 1990, Daria Esteva foi tamén a testemuña principal do filme que Joaquín Jordà lle dedicou á memoria do seu pai Jacinto Esteva, El encargo del cazador. A relación de amizade que Esteva e Jordà mantiveron levounos a colaborar na dirección a catro mans do filme Dante no es únicamente severo (1967), que é considerado o filme que inaugurou a que se daría en chamar Escola de Barcelona, da que precisamente Joaquín Jordà e Jacinto Esteva se afastarían para superala coa súa práctica fílmica. Daria recuperou o nome Únicamente Severo Films para a produtora coa que traballa actualmente, coa que se encargou da remontaxe do filme orixinal e da creación da copia en DCP, igual que nós recuperamos o nome do Numax presenta de Jordà para o noso proxecto, polo que nos fai especial ilusión esta visita ao Cinema NUMAX.
'Las altas presiones' de Ángel Santos ocupa con Nick Cave a carteleira da semana
Canda as últimas proxeccións de 20.000 anos na terra, o filme que mestura ficción e realidade en 24 horas da vida de Nick Cave, Ángel Santos presenta no Cinema NUMAXLas altas presiones a súa última longametraxe, estreada no Festival Internacional de Cinema de Busan (Corea do Sur), galardoada co Premio Nuevas Olas do Festival de CIne Europeo de Sevilla 2014 e mención especial do xurado mozo no REC Tarragona 2014.
O filme, rodado entre Galicia e Portugal, conta a volta de Miguel á que un día foi a súa cidade na procura de localizacións para un filme alleo. A cor verde do campo e a azul do mar emborranchadas polas ruínas industriais de Pontevedra. Festas, concertos, viaxes e flirteos a destempo nos que saber cantos trens deixará marchar antes de subir a un (de chegar a facelo) convértese en cuestión de vida ou morte. O que é igual, cando deixará de vivir dos filmes dos outros para dirixir a súa propia vida.
|
Ningún comentario:
Publicar un comentario