Teo - Títeres e As Fillas Bravas no mes do teatro do concello

O mes do teatro de Teo continúa coa función familiar de títeres “a modernidade chega á vila”
As Fillas Bravas de Chévere comezan unha minixira en Teo con actuacións nas vindeiras semanas en Reis, nos Tilos, en Calo e en Luou 

O mes de outubro continúa en Teo con teatro. Esta sábado prográmase unha función familiar de títeres indicada para nenos/as de máis de 5 anos. Fanfarra títeres presenta “A modernidade chega á vila” o sábado 25 ás 18:30 horas no Centro Cultural da Pontevella en Reis. A entrada é de balde ata completar aforo. 

Na historia que nos contará Fanfarra títeres preséntase a Glon, un novo aprendiz nunha biblioteca, na que Flora lle mostrará todos os segredos sobre os libros perdidos, aqueles que están en perigo de perdese pola falta de interese da xente neles. Gofken é o gran mestre bibliotecario e coñece cada historia de cada un dos libros das bibliotecas de todo o mundo. Na historia da “modernidade chega á vila” fálase desa modernidade destrutiva que moitas veces esquece a beleza polo que sempre foi da xente: o amor pola natureza. 

O domingo o mes do teatro cambia de rexistro coa presenza das Fillas Bravas de Chévere no Centro Cultural da Pontevella ás 18:00 horas. Con esta actuación comeza unha minixira deste espectáculo por Teo. As Fillas Bravas estarán o 30 de outubro ás 20:00 horas no local da Asociación Recreativa e Cultural dos Tilos, o domingo 9 de novembro ás 17:00 horas na Carballeira do San Martiño en Franco se o domingo 30 de novembro ás 18:00 horas no local da Asociación Cultural A Mámoa en Luou. 

As fillas bravas é unha montaxe de Chévere na que están en escea tres mulleres: Patricia de Lorenzo, Mónica García e Arantza Villar. Con esta peza a compañía residente do Concello de Teo segue explorando as posibilidades dun teatro con perspectiva de xénero. E nesta liña de traballo estas fillas bravas veñen a reafirmar modelos empoderados de muller, vencellados a expresións culturais tradicionais que agochan berros emancipatorios e cantos de rebeldía insospeitados, segundo indican as propias artistas. 

O VII Mes do teatro péchase o 2 de novembro ás 19:00 horas en Reis coa peza “Sede de mal” de Boneca Lareta- Culturactiva dirixida a un público adulto. A entrada de todas as funcións do Mes do teatro son gratuítas. Dende o Concello de Teo agradécese que os/as espectadores/as fagan unha contribución ao Banco Veciñal de Alimentos de produtos non perecedeiros. Dende o propio Banco solicitan de xeito prioritario leite e conservas.

Ningún comentario: