AYUNTAMIENTO DE BRION


O CONCELLO DE BRIÓN APOIA A REIVINDICACIÓN
DO CAMIÑO XACOBEO ENTRE NOIA E SANTIAGO

O alcalde Xosé Luís García invita aos veciños a sumarse á peregrinación reivindicativa do sábado 21 de maio

19 de maio de 2010.- O Concello de Brión apoia a reivindicación como Camiño Xacobeo da ruta que une Noia con Santiago, e que transcorre tamén polo municipio brionés. Neste sentido, apoia a iniciativa das tres patronais de Noia (Noia Histórica, Punto Comercial San Lázaro e Asociación de Empresarios) e do Concello de Noia de organizar unha peregrinaxe a Compostela este venres 21 de maio, co gallo da celebración de Santa Rita.

O alcalde de Brión, Xosé Luís García, considera que “sempre se dixo que Noia era o porto de Compostela, sobre todo desque arredor do século XII deixaron de atracar barcos en Padrón, polo que foron moitos os pelegríns que chegaron a visitar o Apóstolo dende aló, atravesando Brión”. De feito, algunhas lápidas sepulcrais da igrexa de Santa María a Nova dan testemuño dos moitos pelegríns que chegaron a Santiago por mar a través do porto noiés.

Neste sentido, o Concello de Brión anima aos veciños e veciñas que o desexen a que se sumen á peregrinación reivindicativa, que terá lugar o vindeiro 21 de maio aproveitando a tradicional camiñata de Santa Rita. Así, quen desexe participar terá que porse en contacto con Noia Histórica antes do 20 de maio.

Esta non é a primeira ocasión na que o Concello de Brión reivindica a delimitación deste camiño. Xa no ano 2003, o Concello brionés dirixíuse á Xunta de Galicia para informar da posible presenza duns restos arqueolóxicos na zona de Paradela, cuxo mesmo nome indica lugar descanso (“paradiña”). 

Ningún comentario: