AYUNTAMIENTO DE BRION


CAMPAMENTOS, OBRADOIROS, INFORMÁTICA, COCIÑA PINTURA E PEREGRINACIÓN A SANTIAGO COMPOÑEN
A OFERTA DO CONCELLO DE BRIÓN PARA O VERÁN

A gran novidade deste ano é a realización do Camiño de Santiago dende O Cebreiro

18 de maio de 2010.- O Concello de Brión vén de elaborar unha completa oferta de lecer para os meses de verán, denominada “Brión-verán 2010”, que está dirixida especialmente aos máis novos do municipio. Un programa que inclúe un total de oito actividades, algunhas xa tradicionais como os obradoiros de verán, o curso de cociña para rapaces, o campamento infantil ou o curso de iniciación á pintura; e tres novidades: un curso de novas tecnoloxías, o intercambio xuvenil con Guillena e unha peregrinación a Santiago de Compostela.

Aproveitando a celebración do Ano Santo, o Concello de Brión vai levar a cabo dúas actividades co Camiño de Santiago como gran protagonista. Así, entre o 12 e o 18 de xullo, o Concello de Brión organizará unha peregrinación ata Compostela para rapaces de 13 a 17 anos do municipio. Unha viaxe que se fará dende O Cebreiro e que ten unha cota de inscrición de 25 euros.

Así mesmo, un centenar de mozos e mozas de Brión, de entre 18 e 35 anos, poderán viaxar entre o 23 e o 30 de xullo a Guillena (Sevilla) para participar no terceiro Intercambio Xuvenil con Guillena. Unha viaxe que devolverán en agosto un centenar de mozos de Guillena, interesados en coñecer Brión e achegarse ata Compostela neste ano Xacobeo. A cota de inscrición neste intercambio é de 80 euros.

Obradoiros de verán

A oferta de lecer do Concello de Brión para este verán comezará a finais de xuño, coa convocatoria dun curso de iniciación á pintura. Un obradoiro dirixido a rapaces e rapazas de entre 6 e 13 anos de idade que terá lugar no CEIP de Pedrouzos. Os rapaces de 6 a 9 anos asistirán en horario de 10.30 a 12:00 horas, mentras que os rapaces de 10 a 13 anos farán o propio de 12:00 a 13:30 horas. O curso desenvolverase en dúas quendas: do 23 ao 30 de xuño e do 1 ao 8 de setembro. A cota de inscrición é de 25 euros.

Así mesmo, para facilitar a conciliación da vida laboral e familiar dos pais e nais de Brión, o Concello programou unha nova edición dos Obradoiros de Verán, que ocuparán as mañás do mes de xullo dos rapaces de entre 3 e 12 anos de idade. O Concello de Brión mantén o mesmo prezo do ano pasado (60 euros) e porá un autobús gratuíto para recoller aos rapaces nas paradas do transporte escolar. Estes obradoiros, que se impartirán nas instalacións do CEIP de Pedrouzos, terán lugar de luns a venres do 1 ao 31 de xullo (excepto festivos) en horario de 10:00 a 13:30 horas.


Cociña e novas tecnoloxías

Para as tardes do mes de xullo, o Concello de Brión convoca un curso de novas tecnoloxías, dirixido a rapaces de entre 4 e 15 anos de idade. Os rapaces clasificaranse segundo a súa idade e terán dúas clases semanais, de 45 minutos cada unha, no Telecentro de Comunicacións. A cota de inscrición é de 15 euros.

Así mesmo, o Concello de Brión ofrece tamén unha nova edición do seu Obradoiro de Cociña, no que pequenos de entre os 6 e os 15 anos de idade aprenderán a facer distintos pratos: dende pizzas ata asados. O curso, que terá lugar todos os mércores do mes de xullo no CEIP de Pedrouzos, ten unha cota de inscrición de 15 euros.

O programa “Brión-verán 2010” rematará no mes de agosto, coa celebración do tradicional campamento infantil. Un campamento dirixido a rapaces e rapazas de 8 a 12 anos de idade e que terá lugar do 2 ao 13 de agosto. O Concello de Brión baralla dúas posibilidades, segundo o número de rapaces que se anoten: o campamento xuvenil Virxe de Loreto (Porto do Son) ou o campamento xuvenil Espiñeira (Boiro). En ambos casos, a cota de inscrición é de 60 euros.

Todas estas actividades están dirixidas aos nenos e mozos empadroados en Brión, que terán preferencia á hora das anotacións. As inscrición poden formalizarse na Casa da Cultura ou no teléfono 981 50 99 08. Todas as actividades teñen un número de prazas limitado, polo que a admisión realizarase por rigurosa orde de inscrición. No caso de quedar prazas libres, a inscrición abrirase tamén a rapaces de fóra do municipio.

Ningún comentario: