O Comité de Empresa e a Xunta de Persoal e as seccións sindicais do Concello de Ames fan balance da actual lexislatura e catalogan de “nefastas e practicamente inexistentes” as relacións laborais, o diálogo social e a negociación colectiva mantidas co goberno municipal. Unha situación que xa se viña arrastrando desde o anterior mandato. Os órganos de representación do persoal agardan e reclaman que a situación cambie co novo goberno.
Os representantes do persoal do Concello de Ames consideran que o actual goberno municipal non tomou en serio a negociación colectiva. Un claro exemplo da despreocupación e o desleixo nesta materia foron os longos períodos de tempo nos que non se convocou a Mesa Xeral de Negociación nin o Comité se Seguridade e Saúde, a pesar das reiteradas solicitudes de reunión da parte social e da importancia dos temas que estaban pendentes.
Dende outubro de 2012 ata novembro de 2013 pasou máis dun ano sen que a Mesa Xeral de Negociación se reunise. O mesmo ocorreu dende decembro de 2013 ata xuño de 2014. E cando se celebrou a xuntanza tampouco serviu de moito, porque en ningún momento o goberno demostrou vontade de sacar adiante os temas tratados e estes volveron quedar sen resolver reunión tras reunión.
En canto ao Comité de Seguridade e Saúde, tamén pasou máis de ano e medio sen reunirse, malia que ten obriga legal de facelo cada 3 meses. Este órgano reuniuse en total 5 veces en toda a lexislatura, tres veces en 2012, ningunha en 2013, unha en 2014 e outra en 2015.
Cómpre lembrar que o 5 de xuño de 2014 o persoal do Concello de Ames, canso de solicitar xuntanzas co goberno municipal e non ter respostas, decidiu realizar unha concentración diante da Casa do Concello para reclamarlle ao alcalde seriedade e que sentase a negociar e a sacar para diante os temas pendentes dunha vez por todas. En canto o goberno tivo coñecemento desa concentración accedeu a convocar a Mesa Xeral de Negociación, pero a maioría dos temas que levaban meses agardando volveron quedar, unha vez máis, enriba da mesa.
Esta foi a tónica xeral deste mandato, con asuntos que levan pendentes de tramitar dende o ano 2012 como o Acordo sobre descontos nas incapacidades laborais temporais. Outros, como a aprobación dun Regulamento de xestión das listas de agarda para a contratación de novo persoal ou a regulamentación e control dos servizos extraordinarios fóra da xornada están pendentes de que se convoque a correspondente comisión.
Por outra banda, durante esta lexislatura non se produciu avance ningún e non se mostrou interese en abordar asuntos tan relevantes como a actualización da Relación de Postos de Traballo (RPT), que data do ano 2006 e está totalmente desfasada coa realidade actual; a precariedade laboral motivada pola temporalidade da inmensa maioría dos traballadores/as municipais; a disfuncionalidade que existe nos postos de traballo, pois boa parte do persoal está realizando funcións que non se corresponden coa categoría pola que está contratado; a falta dun acordo regulador común aplicable tanto a persoal funcionario como laboral, etc.
Proposta enviada ás formacións políticas que concorren ás eleccións municipais
Ante esta situación, arrastrada xa desde o anterior mandato, os órganos de representación do persoal e as seccións sindicais do Concello de Ames agardan que a política laboral cambie co novo goberno, sexa da cor que sexa. Por este motivo enviáronlles a todas as formacións políticas que concorren ás eleccións municipais de maio de 2015 unha proposta con obxectivos básicos para a xestión de persoal durante a vindeira lexislatura. Nesa proposta insisten tamén na necesidade de establecer un diálogo fluído, serio e eficaz para emendar as carencias e deficiencias da estrutura de organización do persoal municipal que redunde na mellora dos servizos públicos que presta o concello.