O presidente da xunta xestora do Partido Popular de Santiago, Agustín Hernández, transmitiu hoxe aos membros deste órgano a necesidade de acometer unha profunda reflexión tras os resultados das eleccións municipais do pasado 24 de maio, que sirva para abrir o partido a unha nova etapa de renovación e de rexeneración e planificar o futuro.
Para o PP local, os resultados obtidos, tanto en Santiago como en Galicia e España, son un toque de atención da cidadanía que debe conducir ao partido a detectar e corrixir os erros cometidos e retomar de inmediato a conexión perdida cunha parte importante da sociedade.
Hernández trasladou á xestora que “somos un partido centrado, que representa o sentir común e a moderación de boa parte da poboación, que ten demostrado a súa capacidade de xestionar con eficacia e rigor, pero que nestes momentos, por erros propios e tamén polo desgaste de ter que gobernar e tomar decisións difíciles, padece un evidente déficit de confianza e de conexión coa cidadanía”.
Segundo o responsable local do partido, ábrese unha nova etapa na que “é necesario facer un esforzo por estar mais na rúa, por abrir o partido á cidade e por demostrar que seguimos sendo unha opción de goberno clara para Santiago de Compostela”.
Como parte desa nova etapa, comunicou aos membros da xunta xestora que, de xeito coordinado co calendario xeral e as estratexias do partido nos ámbitos nacional e autonómico, comezarán os preparativos para organizar un congreso local que servirá para retomar a normalidade interna dentro da formación e rematar coa actual etapa de transitoriedade.
Ningún comentario:
Publicar un comentario