Psoe Teo - Iniciativa parlamentaria contra os vertidos en Os Verxeles

Iniciativa socialista no Parlamento de Galicia para paralizar o vertido dos Verxeles

En diferentes informes de Augas de Galicia e que deron lugar a expedientes sancionadores, un cunha multa imposta de 18.000 euros, agora paralizado, sinálase que na Estación de bombeo dos Verxeles non se está a bombear a totalidade de augas residuais, o que provoca o vertido de grandes cantidades de augas sen depuración previa de xeito continuo ao regato de Portameneiro, que desemboca no río Tella, a súa vez afluente do Ulla.

Informes desde febreiro de 2011, vídeos na web http://www.youtube.com/watch?v=U2VMVKKKUd8 de maio de 2011, amosan como un grave problema medioambiental, como é o vertido non autorizado de augas residuais a un río, existe desde hai mais de 3 anos, sen ningunha subsanación do tema.

No Pleno do mes de marzo de 2013, o PSOE de Teo presentou unha moción na que se instaba ao Goberno Municipal do Concello de Teo e/ou á Xunta de Galicia que no ámbito das súas competencias, acometesen as obras necesarias para a paralización deste vertido de augas residuais da rede municipal así como á adopción de medidas para a rexeneración medioambiental no Lugar da Palloza, Os Verxeles, Oza.

Unha emenda presentada polo grupo de goberno e só apoiada cos seus votos e aprobada polo voto de calidade do Alcalde, fixo decaer a proposta orixinal socialista, demandando só da administración promotora da obra, a Xunta, a solución dos graves problemas deste vertidos.

As diferencias entre administracións, Concello-Xunta, amosáronse na reunión entre os portavoces municipais e o entón conselleiro Agustín Hernández, o pasado 24 de xullo de 2013, na que se acordou levar a cabo unha medición dos caudais por tramos, para determinar cal é a causa do exceso de caudal na EBAR, se as pluviais filtradas ou unha inicial determinación errada da poboación pola Xunta.

Neste reunión falouse tamén de que en seis meses estaría realizada esta auditoría e poderían determinarse as medidas xa oportunas para a paralización total do vertido.

No último Pleno do mes de xuño, Uxía Lemus preguntou por esta auditoría, e o concelleiro do grupo de goberno Rafa Sisto sinalou que se estaba a acometer este estudo pola Empresa Pública de Obras e Servizos Hidráulicos, e que agardaban ter os resultados a finais de xullo.

O certo é que o vertido segue a existir, e que a zona segue chea de restos colmatados con materiais de hixiene persoal, e cun forte cheiro a fecais. O PSOE de Teo agardou pacientemente o resultado do estudo das causas deste vertido, que en xullo do 2013 se fixara para decembro dese mesmo ano, e que a 2 de xullo de 2014 aínda non rematou.

Ante esta situación anómala, impulsamos, a través da deputada socialista Patricia Vilán, a presentación de dúas proposicións non de lei para o seu debate en Pleno e na Comisión de Medio Ambiente do Parlamento de Galicia, instando á Xunta de Galicia a que tome as medidas necesarias para a paralización deste vertido.

Ningunha das administracións implicadas tomaron medida algunha encamiñada a solventar o problema. Todas e cada unha delas botaron balóns fóra. A única resposta existente a este gravísimo problema é un continuo cambio de informes e contra-informes entre a Xunta de Galicia, Augas de Galicia e o Concello de Teo, agora agardando o resultado dun estudo de caudais, sen que ningunha Administración pública proceda a solucionar o vertido nin a degradación medioambiental causada polo mesmo.

Uxía Lemus, concelleira do PSdeG de Teo, sinala que “estamos a utilizar os escasos medios de presión ao noso alcance, tanto no Concello como no Parlamento de Galicia, a fin de que das palabras se pasen aos feitos, se paralice o grave vertido xa denunciado hai mais de tres anos e se rexenere a zona ”.

Ningún comentario: