A Xunta pon en servizo a depuradora de Ponte Carreira, que eliminará verteduras ao río Tambre tras un investimento de 1,3 millóns de euros
O alcalde de Frades agradeceu a colaboración da Xunta e agarda que este ano podan comezar as obras do punto limpo Frades-Mesía
A conselleira de Medio Ambiente, Territorio e Infraestruturas, Ethel Vázquez, asistiu hoxe a posta en servizo dos colectores xerais e da Estación Depuradora de Augas Residuais (EDAR) de Ponte Carreira (Frades). Nesta visita, Ethel Vázquez estivo acompañada polo alcalde de Frades, Roberto Rey; pola delegada territorial da Xunta de Galicia na Coruña, Belén do Campo; polo director de Augas de Galicia, Gonzalo Mosqueira; e polo deputado no Parlamento de Galicia, Miguel Prado Patiño, entre outros.
A máxima responsable de Medio Ambiente do Goberno galego subliñou que con esta actuación dótase dun servizo de saneamento axeitado á maior parte da parroquia de Gafoi e a parte da parroquia de Ledoira, ademais de supoñer a eliminación de verteduras no río Tambre. Unha actuación que significou un investimento de máis de 1,3 millóns de euros.
Mellora do río Tambre
Pola súa banda, o alcalde de Frades destacou que esta nova EDAR “vai beneficiar non só aos veciños de Ponte Carreira, Gafoi e Ledoira, senón que tamén vai supoñer unha significativa mellora da calidade das augas do río Tambre, onde temos situada unha fermosa área recreativa e onde municipios como O Pino ou Santiago teñen as súas captacións de auga. Coa posta en marcha desta obra podemos asegurar que esa auga estará moito máis limpa”. Roberto Rey tivo tamén palabras de agradecemento para o anterior conselleiro de Medio Ambiente, Agustín Hernández, e para o ex alcalde e deputado autonómico Miguel Prado, “pois foron quen iniciaron este proxecto”.
Así mesmo, Rey Martínez pediulle a Ethel Vázquez que “sigades traendo proxectos a Frades. Espero que este ano comecen as obras do punto limpo conxunto entre Frades e Mesía e que os proxectos para levar o abastecemento a Moar e Añá, que xa están na Consellería, poidan saír adiante canto antes polo ben dos veciños e veciñas de Frades”.
Finalmente, Miguel Prado felicitou á Xunta e á empresa adxudicataria das obras polo bo traballo realizado, especialmente a Gonzalo Mosqueira, quen estivo como director de execución desta obra practicamente ata o seu nomeamento como director de Augas de Galicia. Así mesmo, tivo palabras de especial agradecemento para Agustín Hernández, de quen dixo que “foi o mellor conselleiro que tivo nunca Frades, por todos os proxectos que puxo en marcha”. Así mesmo, lembroulle a Ethel Vázquez a importancia que terá para Frades a aprobación do PXOM, que abrirá “unha nova etapa para a consolidación da poboación e para facerlle a vida máis fácil aos veciños”.
Obras realizadas
As obras que se levaron a cabo consistiron na construción de 5.750 metros. de rede separativa de saneamento na parroquia de Gafoi, conexión da rede existente de Ledoira e estación depuradora das augas residuais; a rede de pluviais: de 680 m. de lonxitude, 555 metros de colectores PVC e 125 m. colectores. Así mesmo reparáronse colectores de pluviais existentes.
Na rede de residuais executáronse algo mais de 5 quilómetros de colectores xerais; fixéronse reparacións en colectores de fecais existentes; un bombeo de 1+1 bombas de 4,4 KW. A EDAR de Ponte Carreira ten unha capacidade para dar servizo a mais de 600 habitantes; un edificio de tratamento de lodos, tratando un caudal medio: 8,5 m3/h e un caudal máximo: 20 m3/h, entre outras actuacións.
Esta acción era necesaria posto que a parroquia de Gafoi, á que pertence o núcleo de Ponte Carreira, tiña unha rede de saneamento unitaria e as augas pasaban por unha depuradora sen mantemento que vertía ao río Tambre, case sen tratamento. A parroquia de Ledoira non tiña rede de residuais.
Con esta actuación, en Gafoi executouse unha rede separativa de saneamento e, en Ledoira, realizouse un colector de augas fecais que conecta coa rede de Gafoi. As augas residuais procedentes de Gafoi e de Ledoira pasan a verter a unha nova depuradora que pode tratar ata 600 habitantes equivalentes. A EDAR e as canalizacións instaladas se dimensionaron para que no futuro poidan conectarse os restantes núcleos de Ledoira.
Aposta por Frades
Vázquez resaltou que esta obra constitúe un exemplo máis da colaboración institucional que se debe dar nun servizo básico como é a auga. Nas súas palabras non esqueceu lembrar a aposta da súa Consellería polo concello de Frades, o que se traduce nun investimento de máis de 2,8 millóns de euros dende 2009 en actuacións como a construción da EDAR, a mellora de seguridade viaria na travesía de Abellá (onde se investiu preto de medio millón de euros) ou o reforzo de firme localizado nas estradas Ordes-Lanzá. Unha actuación proxectada en dúas fases: a primeira, cun importe de 580.000 euros, supuxo a mellora da Travesía de Pedrouzo en Frades e xa está rematada; a segunda dará comezo na segunda quincena deste mes, cun investimento de preto de 600.000 euros.


Ningún comentario:
Publicar un comentario