Santiago - Mark Olson presenta o seu novo traballo dentro do ciclo Sons

Mark Olson, fundador, cantante, guitarra e co-autor dos éxitos da banda The Jayhawks presenta en España “Good Bye Lizelle”, o seu revelador álbum de 2014, xunto con Ingunn Rongvold e o gran harmonicista español Juan Blas Becerra. Será o domingo 1 de novembro ás 20.30 h no Teatro Principal dentro do ciclo Sons. As entradas para o concerto, a 10€ anticipada e 12€ o día do concerto, poden mercarse no despacho de billetes do Principal, en entradas.abanca.com ou no 902 434 443

Con este álbum o artista marca un punto e aparte con respecto a todo o que fixera antes, con Jayhawks e con Creekdippers, creando un novo son optimista e claro. “Good Bye Lizelle” é unha colección de cancións nas que se condensan décadas de traxectoria musical. Gravado en caravanas, casas de campo e habitacións de hotel xunto á súa compañeira Inngun Ringvold, cantante e multi-instrumentista norueguesa, o álbum destila vitalidade e suavidade sonora.

O traballo musical e Mark Olson é ben coñecido para os amantes do xénero musical “Americana” e o “Alt Country” a través de The Jayhawks e máis tarde en Creekdippers xunto coa súa parella de entón, Victoria Williams e Mike Russel. Con esta nova etapa o artista da renda solta aos novos sons, introducindo un toque especial de harmónica tras a magnífica experiencia na súa xira anterior, contando con Juan Blas.

Santiago - Vaudí canta a Victor Manuel en Sons'15

Vaudí presenta ‘Un poco de ti…’ en Compostela dentro do ciclo Sons’15. O concerto, no que interpreta temas de Víctor Manuel en clave brasileira, será hoxe martes 12 de maio ás 20.30h no Salón Teatro. As entradas teñen un prezo de 5 euros e poden mercarse no despacho de billetes do Teatro Principal (aberto de martes a sábado de 18.00 a 21.00h), en entradas.abanca.com e no 902 434 443. Ademais, o propio día do concerto, tamén se poden adquirir no Salón Teatro a partir das 18.30h.

‘Un poco de ti...’ o novo proxecto de Vaudí reúne once cancións de Víctor Manuel filtradas a través da música brasileira. Bossa, jazz e música popular brasileira para reinterpretar éxitos como ‘Nada sabe tan dulce como su boca’ ou ‘Solo pienso en ti’ nun disco co que Vaudí Calvacanti (músico orixinario de Pernambuco) tamén quere homenaxear a terra asturiana que o acolleu con agarimo xa hai máis de vinte anos.

O propio Vaudí, invitado por Víctor Manuel, foi o encargado de abrir recentemente os multitudinarios concertos que en Oviedo celebraron os 50 anos de carreira do cantautor asturiano.

VAUDÍ voz/guitarra

SAMUEL RODRÍGUEZ teclado

TONY CRUZ baixo

CARLOS MANKUZO batería

Máis Sons’15

O ciclo continuará en maio con Gil do Carmo o día 23 no Auditorio Abanca, no que nos presenta ‘A Uma Voz’, e o venres 29 de maio con Puntada sen fío que ofrece o seu primeiro traballo discográfico ‘A lúa prendeu a luz’; será no Centro Galego de Arte Contemporánea ás 21.00h. Xa en xuño estará o venres 5 Fred Martins co seu novo traballo ‘Para além do muro do meu quintal’ no Teatro Principal e o mércores 10 pechan a programación deste primeiro semestre Uxía&Narf no Salón Teatro con ‘As baladas da Galiza imaxinaria’.

Santiago - Hoxe no Sons'15 Screaming Headless Torsos

O ciclo Sons’15 botará esta semana unha ollada a América e desde alí chegarán dous concertos moi singulares.Hoxe, xoves 5 de marzo, e chegados de New York, estarán os Screaming Headless Torsos, os magos da fusión: crossover, metal, funk, R&B, hip-hop… a partir das 21.00h na Sala Capitol, acompañados dos galegos Cats and Monkeys. E o domingo 8 a partir das 19.30h, tamén na Sala Capitol, poderemos gozar do Walkin’&Talkin’10th Anniversary Tour de Eli ‘Paperboy’ Reed Trío que chega desde Boston co seu soul e rhythm&blues.

Screaming están en Compostela por vez primeira e darán na cidade o seu único concerto en Galicia. Trátase do concerto co que dan comezo á súa xira europea e estarán no escenario algúns dos músicos máis reputados de Nova York. Fundada a mediados dos noventa, os Screaming Headless Torsos foron sempre unha banda de culto, dirixida a públicos moi diversos, con amplos gustos e amantes dos cruces de estilos. Constitúen o máximo expoñente do crossover metal, funk e jazz-rock, sempre sobre bases e cores vocais da música negra con reminiscencias rhythm&blues e hip-hop. 

Moitos consideran a David Fiuczynski coma un dos líderes máis eclécticos do mundo do rock: a súa guitarra soa a jazz, a banda explota en rock, o cantante supura funk e blues… un auténtico festín de sons e estilos… A Fiuczynski, creador da banda, líder e alma mater, acompáñano Freedom Bremner, que é o novo gran fichaxe á voz; David Ginyard, ao baixo; James ‘Biscuit’ Rouse tras a batería, coñecido por traballar con voces como Alicia Keys ou Lauren Hill; e por último, Nate Werth, na percusión e gañador dun Grammy coa súa outra banda, Snarky Puppy.

En 2014 publicaron Code Red, novo álbum tras un silencio de 9 anos que os trae de novo a Europa. Un concerto no que se gozará tamén do acid jazz dos lucenses Cats and Monkeys, banda formada por veteráns músicos galegos e con temas xeniais que abrirán a noite.

As entradas teñen un prezo de 20€ anticipada e 25€ o día do concerto. Poden mercarse no despacho de billetes do Teatro Principal (aberto de martes a sábado de 18.00 a 21.00h); en Servinova, Ticketea, Ticketmaster, breakpoint.es, A Reixa Tenda, salacapitol.com, Portobello (A Coruña), Elepé Discos (Vigo) e Peggy Records (Ourense).

Santiago - Carlos López Quartet no Teatro Principal

O ciclo Sons’15 Jazz, que xa nos ofreceu neste mes de xaneiro concertos de Iago Fernández Sixtet e de Sumrrá, programa este domingo a Carlos López Quartet que nos presenta o seu novo traballo ‘Letters from København’. Será ás 20.00h no Teatro Principal e as entradas teñen un prezo de 8 euros anticipada e 10 euros o propio día do concerto. Poden mercarse no despacho de billetes do propio Principal de 18.00 a 21.00h, en entradas.abanca.com e no teléfono 902 434 443.

Xa coa súa primeira gravación o cuarteto, gañara o primeiro premio á mellor composición do Jazz Galego no ano 2006. Desde aquel entón, Carlos López, non parou de medrar artisticamente. Os seus dous seguintes traballos, baixo o seu alter ego "The Last Minute Experience", deixaron patente a súa capacidade camaleónica para reinventarse en cada disco, dando lugar a un dos proxectos máis orixinais de Jazz feitos na península, que nada tiña que ver co seu primeiro proxecto. 

A finais do ano pasado, a carreira do baterista e compositor galego, toma un novo rumbo, ao ser seleccionado como un dos músicos integrantes, do prestixioso master de Jazz Europeo EUJAM. Neste tempo, tivo a oportunidade de levar a súa música por cidades como Copenhague, Berlín e Amsterdam. Como froito desta experiencia, nacen tres novos traballos discográficos nos que Carlos volve ao Jazz mais acústico. Nesta ocasión, teremos a oportunidade de escoitar a primeira entrega desta triloxía, composta e gravada en Copenhague con músicos nórdicos e galegos.

‘Letters from Københav’ é a última gravación como líder e o froito da última aventura de Carlos López, esta vez por diferentes capitais europeas, na que aflora a súa frutífera experiencia ao interaccionar e convivir con músicos de diferentes nacionalidades. O polaco Maciek Kadziela, o sueco Joel Illerhag e o galego Xan Campos –tamén inmerso nunha fecundo periplo europeo– conforman a quintaesencia escollida polo batería galego de entre un nutrido grupo de músicos cos que colaborou na capital danesa. As composicións de Carlos López manifestan unha clara deriva cara a tradición do jazz europeo e incluso do free jazz cultivado no vello continente, sen abandonar por iso claras referencias a Coltrane ou Monk.

MACIEK KADZIELA saxofón

XAN CAMPOS piano 

JOEL ILLERHAG contrabaixo 

CARLOS LÓPEZ batería

Santiago - Catro bandas galegas no avance do Sons’Jazz 2015

· Todos os concertos serán no mes de xaneiro no Teatro Principal

O avance do ciclo Sons’Jazz 15 ofrece en concerto a catro bandas galegas no mes de xaneiro. Catro bandas galegas que contan coa colaboración de artistas internacionais e que presentan catro discos novos o que vén a confirmar a boa saúde da que goza o jazz no noso país.

O domingo 4 de xaneiro ás 20.30h Iago Fernández Sextet presenta o seu novo disco ‘Acougo’ que se trata do seu segundo traballo discográfico. Iago Fernández (Cangas, 1987), é un novo músico formado en percusión clásica e especializado en jazz (Musikene, San Sebastián) chamado a converterse nun dos nomes destacados do jazz galego. Unha ampla traxectoria como sideman teno levado a tocar en España, Europa e América acompañando a nomes como Perico Sambeat, Jordi Rossy, Guillermo Klein, Javier Colina, Masa Kamaguchi, Logan Richardson, Avishai Cohen, Omer Avital etc, e a gravar máis de 20 discos. Acougo conta con 10 temas propios de Iago Fernández cargados de melodía e moita conexión entre os músicos.

Os días 13 e 14 de xaneiro chegarán ao Principal Manuel Gutiérrez, Xacobe Martínez Antelo e L.A.R. Legido, que forman Sumrrá. Tras 14 anos de vida, catro discos e múltiples xiras internacionais, o trío compostelán de jazz grava ao vivo o seu quinto disco no Teatro Principal en dous concertos, en dous seráns, consecutivos. O, segundo Candido Querol, “trío máis innovador da escena española" atesoura unha das traxectorias máis sólidas e constantes do panorama jazzístico español, cunha gran proxección internacional. Cun jazz inclasificable, melódico e moi aberto, no que cómpre salientar a orixinalidade das súas composicións, a calidade dos seus integrantes e a frescura dos seus directos... Sumrrá non entende de modas, de etiquetas, nin de estilos.

O seguinte concerto será o 18 de xaneiro con Carlos López Quartet que presenta Letters from København, a súa última gravación como líder e o froito da súa última aventura, esta vez por diferentes capitais europeas, na que aflora a súa fructífera experiencia ao interaccionar e convivir con músicos de diferentes nacionalidades. O polaco Maciek Kadziela, o sueco Joel Illerhag e o galego Xan Campos –tamén inmerso nunha fecundo periplo europeo– conforman a quintaesenza escollida polo batería galego de entre un nutrido grupo de músicos cos que colaborou na capital danesa. As composicións de Carlos López manifiestan unha clara deriva cara a tradición do jazz europeo e incluso do free jazz cultivado no vello continente, sen abandoar por iso claras referencias a Coltrane ou Monk.

Pecha este avance que hoxe presentamos o concerto de Roberto Somoza Trío que realizará o 31 de xaneiro no Teatro Principal compostelán unha dobre presentación. O saxofonista galego interpretará co seu trío boa parte dos temas dos seus dous últimos traballos discográficos: Cal y Arena (2014) e The Modal Jazz Concepts (2014). Acompañado polo finés Risto Vuolanne no contrabaixo e o galego Naíma Acuña na batería, Roberto Somoza contarános a conexión existente entre estos dous proxectos musicais que xiran en torno ás dúas correntes máis importantes deste xénero: o jazz tradicional (tonal) e o jazz modal.

Santiago - O gaiteiro pontevedrés Oscar Ibáñez presenta ‘Alén do mar’ dentro do ciclos Sons’14

Oscar Ibáñez presenta o seu primeiro traballo discográfico en solitario baixo o título “Alén do mar” (VIR, 2012). Neste disco o gaiteiro e frautista pontevedrés invítanos a unha viaxe sonora que discorre polo Atlántico chea de orixinalidade, imaxinación e creatividade, a través dunha magnífica selección de melodías galegas e latinoamericanas enriquecidas con elementos propios da música celta. O concerto será mañá, xoves 4 de decembro, ás 21.00h no Teatro Principal, dentro do ciclo Sons’14. As entradas, a 10 euros, poden mercarse no despacho de billetes do Principal, aberto de 18.00 a 21.00h, en entradas.abanca.com ou no 902 434 443.

Oscar Ibáñez mestura muiñeiras ancestrais recollidas polo gaiteiro boticario Perfecto Feijóo, composicións celtas do virtuoso violinista Manuel Quiroga ou un tema dedicado ao pirata da Moureira Benito Soto, co arin-arin, un xénero xerado no Camiño de Santiago Norte ou Camiño da Costa ao seu paso por Euskadi, o flamenco e outras músicas denominadas de ida e volta coma a habanera, o choro, o valse venezolano ou o tango, que atopou na outra ribeira. Para esta nova proposta Oscar Ibáñez inspirouse no poema “O fillo de Celt” do cambadés Ramón Cabanillas aclamado como “Poeta da Raza”. Tras descubrir este poema Oscar Ibáñez, tamén de Porto Santo (San Salvador de Poio, Pontevedra) e bo coñecedor de América, recoñeceuse nos seus versos e asumiu emocionado a tarefa de irmandar musicalmente o Vello e o Novo Mundo, a través das músicas de ida e volta e temática da emigración galega a América latina, nunha mestizaxe fresca, moderna e innovadora. Para poñer son a esta epopea transatlántica Oscar Ibáñez desenvolveu unha labor a medio camiño entre a investigación e a creación realizando así unha fusión sen límites, que ten coma resultado un novo e único son.

Para gravar “Alén do mar” Oscar Ibáñez contou cos excelentes músicos da súa Tribo formada por Fernando Fraga, Harry Price, Carlos Calviño, Paco Dicenta e Andrés Vilán, e coa colaboración doutros magníficos músicos experimentados entre os que figuran os galegos Javier Cedrón, Marcos Teira, Pedro Pascual, Xulio Abal, Alba Barreiro, Simón García, Carlos Castro, Luís Prego, Cristóbal Pascual, Xan Pampín, Moisés Fernández, María Rial e Pedro Rial, o gaditano Francisco Benítez, o navarro Íñigo Aguerri, o vasco Xabier Berasaluze “Leturia”, o irlandés Diarmaid Moynihan, o cubano Oscar Rodríguez, os brasileiros Sergio Tannus e Paulo Silva, os arxentinos Juan Rivero, Federico Santisteban, Nicolás Tabbush e Ángel Bonura e os venezolanos Pablo Camacaro e Néstor Gil. Para a coprodución diste traballo Oscar Ibáñez confiou na creatividade do guitarrista vigués Carlos Calviño.

Oscar Ibáñez. Nado en Pontevedra en 1976. Mestre en Educación Musical, Especialista Universitario en Música Tradicional Galega, Especialista Universitario en Arquivística, Grao Profesional LOE na especialidade de gaita de fol galega e cursou estudos oficiais de frauta de bico. Dende 2004 traballa no Arquivo Sonoro do Servizo de Patrimonio Documental e Bibliográfico da Deputación de Pontevedra onde foi quen de reunir unha colección de 9.000 gravacións sonoras galegas que están a disposición dos cidadáns para a súa consulta

Comezou a tocar a gaita en 1984 con Laureano Mera no grupo "Treboada" de Poio que en 1987 pasou a chamarse “Cristóbal Colón”. Entre 1989 e 2004 formou parte da "Agrupación Folclórica Celme" de Pontevedra coa que participou en numerosos festivais internacionais por toda Europa, nos que entrou en contacto con gaiteiros asturianos, escoceses, irlandeses, bretóns ou búlgaros. Dende 1995 dirixe o "Grupo de Música Tradicional Pai da Cana" co que actuou por toda Galicia e gravou varios traballos. En 1997 comeza a colaborar coa Secretaría Xeral da Emigración da Xunta de Galicia impartindo cursos de gaita e percusión nos centros galegos de América e Europa.

Acadou máis de corenta de premios nos concursos de gaita galega de maior prestixio converténdose nun dos gaiteiros galegos máis galardoado tanto en dixitación aberta como pechada. En 2008 crea a Asociación de Toque Pechado de Pontevedra, unha iniciativa para a recuperación e difusión das formas de expresión musical gaiteiras propias e diferenciais de Pontevedra como o sistema pechado de Manuel Villanueva, Perfecto Feijóo e Xan de Campañó ou o sistema semipechado de Ricardo Portela.

Como músico e produtor aparece en numerosos traballos discográficos como: Alén do mar (VIR, 2012), Son de Poio (Ed. do Cumio, 2009), Musgafol: gaita e piano (Dos Acordes, 2009), Foliada nas Rías Baixas: Homenaxe a Ricardo Portela, o Mestre (Ed. do Cumio, 2008), Agrupacións de Pontevedra: Agrupacións da Provincia (Deputación de Pontevedra, 2008), A música que facemos (Xunta de Galicia, 2008), Himnos e Marchas Procesionais de Galicia (Clave Records, 2007), paidacana12 (Ed. do Cumio, 2006), De ruada en Bos Aires (Ed. do Cumio, 2006), In Mare (Ed. do Cumio, 2003) y Ruta Folk: Terra Galega (Disco Trompo, 1998) entre outros.

Realiza traballos como investigador musicólogo e é o creador e organizador do "Encontro de Gaiteiros MANUEL VILLANUEVA gaitas de fol do noroeste", e mais dos espectáculos "MUSGAFOL" (gaita-piano, gaita-banda e gaita-orquestra), e "JUELLES: Encuentro de Gaitas Europeas". En 2010 organizou os concertos dos "JUEGOS NÁUTICOS ATLÁNTICOS CANTABRIA 2010".

Participou en importantes festivais coma o Festival Intercéltico de Lorient, Festival Internacional do Mundo Celta de Ortigueira, Festival Intercéltico do Morrazo ou o Festival Folk Canarias. Así mesmo colaborou en diferentes proxectos con gaiteiros galegos de renome como Paulo González, Iván Costa, Edelmiro Fernández ou Pablo Devigo e cos internacionais Patrick Molard, Diarmaid Moynihan, Ventzislav Andonov.

Na actualidade está a presentar a seu primeiro disco en solitario “Alén do mar” coa súa banda de directo "Oscar Ibáñez & Tribo", formada por músicos galegos de recoñecida traxectoria como Fernando Fraga, Harry Price, Carlos Calviño, Paco Dicenta e Andrés Vilán, cos que actuou en distintos puntos da península como Galicia, Cantabria, Cataluña, León, Madrid, Andalucía e Canarias, así coma en Bretaña e Italia.

FERNANDO FRAGA acordeón

HARRY PRICE violín

CARLOS CALVIÑO guitarras

PACO DICENTA baixo

ANDRÉS VILÁN percusión / batería

ÓSCAR IBÁÑEZ gaita / frautas

Santiago - German Díaz hoxe no SonsJazz'14

German Díaz presenta ‘Método cardiofónico’ dentro do ciclo SonsJazz’14

· As entradas, a 10 euros anticipada e 12 o día do concerto, poden adquirirse no despacho de billetes do Teatro Principal aberto de 18.00 a 21.00h

O ciclo SonsJazz’14 arranca nesta segunda parte do ano co concerto de German Díaz que presenta ‘Método cardiofónico’. Será hoxe, mércores 17 de setembro, a partir das 21.00h no Teatro Principal. As entradas poden adquirise no despacho de billetes do Teatro Principal que está aberto de 18.00 a 21.00h e teñen un prezo de 10 euros anticipada e de 12 o propio día do concerto.

Latexos de corazón en vinilo, instrumentos mecánicos e zanfona. O novo espectáculo musical de Germán Díaz está baseado nos ritmos de latexos do corazón que o doutor Iriarte gravou nos anos corenta e que editou en vinilo co nome de Método Cardiofónico. Tomando como base estes latexos, crea un universo sonoro único cos instrumentos mecánicos que utiliza e que len os cartóns perforados nos que Díaz escribe as melodías.

O playasax, a rolmónica cromática, o órgano de barbaría e a caixa de música, únense á manivela da zanfona, e á gravación de loops en directo para camiñar entre a improvisación e a rixidez dos cartóns perforados. Germán Díaz interpreta neste espectáculo diferentes instrumentos, todos eles cun elemento en común, que son activados cunha manivela. Son o playasax, rolmónica cromática, caixa de música, órgano de barbaría e zanfona. Axúdase para completar o espectáculo de live looping. 

Santiago - Folk e Blues na programación do día

aCadaCanto e Boo Boo Davis nas propostas musicais para hoxe venres

Santiago - Marlango e Lara bello propostas da fin de semana

Marlango en Compostela Rock e Lara Bello en Sons’14 son as propostas musicais para esta fin de semana

Santiago - Ute Lemper hoxe dentro do ciclo Sons'14

A diva alemá Ute Lemper canta a Pablo Neruda mañá en Compostela dentro do ciclo Sons’14

Será a partir das 21.00h no Auditorio Novagalicia Banco

Santiago - CoraSons dentro do ciclo sons'14

Concerto de presentación do proxecto audiovisual e literario CoraSons, dentro do ciclo Sons’14 

Será hoxe, mércores 12, no Teatro Principal a partir das 21.00h 

Santiago - Dorian Wood inaugura o Sons14

Dorian Wood inaugura mañá Sons’14 presentando o seu último traballo ‘Rattle Rattle’

Será a partir das 21.00h no Teatro Principal nun concerto en colaboración co festival Sinsal