A Asociación de Antigos Alumnos e Amigos da Universidade de Santiago de Compostela publicou un novo número, o 38, da súa revista corporativa, FONSECA. A edición só ten soporte dixital; muda o seu deseño e maquetación, xa que se pode visualizar en Internet como se fose unha revista impresa; e o período, neste caso, é anual, recollendo actividades de todo o 2015. Desde a súa posta a disposición na rede hai quince días, acumula unhas 750 descargas, que corresponden principalmente a España, pero tamén a países americanos e europeos:
A publicación abre con senllas mesas redondas sobre a universidade, que se celebraron nos campus de Lugo e Santiago. Dedica tres páxinas a unha entrevista co traumatólogo de Mondoñedo que operou da cadeira ao Rei Xoán Carlos en 2013: o doutor Cabanela, que vive en USA, indica nas súas declaracións que atopa á Súa Maxestade “moi ben, feliz e optimista”. A Valedora do Pobo, Milagros Otero, tamén é obxecto dunha entrevista.
O repaso das múltiples actividades socioculturais da entidade, como a homenaxe cidadá a Giner de los Ríos (fundador da Institución Libre de Enseñanza) ou a realización do Camiño do Norte desde Tapia de Casariego (Asturias), así como seccións de nomes propios, a presenza da entidade na Rede, o premio de Relato Curto, as novidades do Servizo de Publicacións USC e o recanto da memoria, completan os contidos informativos.
No apartado de Opinión escriben sobre diversos asuntos de actualidade os profesores Felipe Trillo, Peregrina Quintela e Anxo Tarrío. O doutor Sánchez Salorio publica unha peza de cando el se formaba co doutor Castroviejo en Nova Iorke. A revista finaliza cun emotivo obituario da catedrática da USC Esperanza Guisán, que asina a súa colega da Universidade Autónoma de Barcelona Victoria Camps. A contraportada está dedicada a un debuxo feito desde a torre sur da catedral de Santiago, obra do arquitecto do Consorcio de Santiago Pablo Tomé, que tivo a xenerosidade de cedelo a esta publicación que suma 32 páxinas.
Reforzo da xunta directiva
Alumni USC, nome co que tamén se coñece a entidade, celebrou este decembro unha asemblea extraordinaria na que se acordou a incorporación de catro novas persoas á xunta directiva. Son os profesores universitarios Carlos Herrero Latorre e Jesús López Romalde, a profesora de Secundaria María Xosé Taibo Mirón e a economista Isabel Aneiros Penedo.
Tamén se fixo unha pequena reorganización, pola que Julia Melgar Riol, ata agora vogal de Lugo, pasa a ser a vicepresidenta da Asociación, en substitución de Francisco Durán Villa, que pasa a ser vogal a petición propia. A presidenta, Benita Silva Hermo, explica que cumpría “reforzar” a directiva cara a 2016, data en que a entidade celebrará o vixésimo aniversario da súa existencia.
Ningún comentario:
Publicar un comentario