2/6/2016 - Durante os últimos meses o Concello de Ames, a través da
concellaría de Urbanismo, Obras Públicas, e Servizos Básicos, realizou varias
actuacións dirixidas a mellorar as instalacións da área recreativa de Tapia
para que estean en óptimas condicións de cara a tempada estival. 
A
área recreativa de Tapia abarca unha extensión total de 15.000 metros cadrados.
Esta enorme área engloba un gran número de instalacións como son a praia
fluvial, con dúas zonas de baño no propio río, unha piscina para nenos, as
instalacións do club de piragüismo "Ribeiras do Tambre", un muíño
rehabilitado, vestiarios, grellas, e un pequeno bar, todo isto rodeado por
amplas zonas verdes, onde poder tomar o sol, e zonas de aparcadoiro. Estas
instalacións acollen numerosas iniciativas como son os cursos de natación, de
iniciación ao piragüismo, etc.
Para
que estas instalacións estean en perfectas condicións de cara ao inicio do
verán o goberno municipal estivo realizando varias actuacións. En primeiro
lugar, realizouse a preparación do céspede da praia fluvial de Tapia para que
estea en condicións óptimas cando comence a tempada estival. Os traballos que
se realizaron consistiron na sementado de novo céspede, previa preparación e
aboado do terreo. Ademais, reparouse o sistema de rego para garantir a correcta
implantación do céspede que se sementou, e o mantemento deste en condicións
óptimas durante toda a tempada de utilización da mencionada área de lecer. Estes
traballos tiveron un custo de 11.045 euros.
Por
outra banda, executouse un pozo de barrena para garantir o abastecemento de
auga neste lugar. Ata o de agora o único subministro de auga que había viña a
través dunha rede de traída da aldea, pero isto provocaba que houbese problemas
de abastecemento de auga para encher a piscina e para dispor de auga
suficientes nas duchas dos vestiarios. Estes problemas quedan resoltos coa
execución do novo pozo, que subministrará de auga para encher a piscina e para
os vestiarios. A rede da traída seguirá proporcionando auga, pero unicamente a
fonte desta área recreativa. Esta actuación tivo un custo de 2.172 euros.
Outras
das actuacións realizadas foi para acondicionar a área de aparcamento e mailas
sendas peonís. Na zona de estacionamento estendeuse unha capa de zahorra. Tamén
se aplicou formigón nas fochancas existentes neste lugar e realizouse unha
limpeza exhaustiva do contorno da nave do club de piragüismo "Ribeiras do
Tambre", dos aseos públicos e do muíño, xa que despois das inundacións que
se produciron nos últimos meses tiñan moita terra acumulada. Ademais, cómpre
salientar que durante os meses de verán habilitase unha finca anexa a estas
instalacións para dispor de espazo suficiente de aparcamento. Estes traballos
tiveron un custo de 3.238 euros.
Sobre
a prohibición de baño na praia fluvial de Tapia, o concelleiro de Urbanismo,
Obras Públicas e Servizos Básicos, Blas García, indica que “o pasado 23 de maio
recibimos un comunicado da Consellería de Sanidade da Xunta de Galicia
advertindo de que as análises feitas non daban o resultado idóneo para poder
bañarse no río Tambre, polo que houbo que acordoar esta zona e colocar carteis
advertindo desta situación. Na xornada de hoxe xa se realizou unha nova análise
e esperamos ter os resultados este venres”.
Instalacións
do club de piragüismo Ribeiras do Tambre
Por
último, durante este verán vanse a reparar as instalacións do club de
piragüismo Ribeiras do Tambre, situadas na praia fluvial de Tapia. As
instalacións están compostas por dúas naves, unha que funciona como almacén e
outra que contén o ximnasio e o almacén. Ambas naves están unidas por unhas
dependencias elevadas que acollen unha oficina e unha terraza.
O
prego que inclúe a memoria das obras incide en que as deficiencias na
construción provocaron, co paso do tempo, a filtración da auga nos falsos
teitos, desprendidos en varias partes das instalacións, e o consecuente
deterioro do interior dos edificios. A madeira da terraza podreceu co paso do
tempo, polo que esta xa non se pode empregar, e o portón e o pavimento
exteriores tamén están deteriorados. Esta obra conta cun presuposto total de
49.963,19 euros, incluíndo o IVE.
Ningún comentario:
Publicar un comentario