Azaloira presentou o programa da súa XII edición na que colabora o Concello de Silleda
Silleda, 13 de abril de 2012
Azaloira vén de presentar esta tarde o programa para a XII edición, organizada pola Asociación de Baile Xuvenil “Fortín da Pomba”, que conta, como en anos pasados, co apoio do Concello de Silleda. Á presentación asistiron a Alcaldesa de Silleda, Paula Fernández Pena, o Concelleiro de Cultura, Matías Rodríguez, a presidenta de Fortín da Pomba, Josefa Ferreiro, e un dos profesores do grupo de baile.
Este concurso de baile tradicional galego celebrarase o vindeiro 6 de maio a partir das 18.00 horas no Auditorio Manuel Dopazo, e a entrada será gratuíta.
Nesta ocasión participarán os grupos A.C. Donaire, de A Coruña; A.C. Traspés, de Vigo; A.C. Os Xeitosos de Trazo, Trébebe, de Marín; Arroases da A.C.F. O Fiadeiro, de Vigo; As Malveiras, de Vilagarcía e O Cultural de A Ponte Vella, de Teo. Na fin de festa, actuará o Coro Vales Mahía.
Contémplanse tres premios, dous menos que nas anteriores. O primeiro premio, de 1.500 euros é por cortesía do Concello de Silleda; o grupo de baile que quede en segundo posto levará un 800 euros e está doado polos comerciantes e empresas de Bandeira e Silleda, mentres que os terceiros levarán 500 euros por cortesía da Asociación de Baile Xuvenil “Fortín da Pomba”.
Na rolda de prensa, a presidenta da asociación de baile organizadora, Josefa Ferreiro, informou que os premios a mellor acompañamento e mellor vestiario, só se entregarán se consigue diñeiro para tal fin.
Asemade, destacou que a neste concurso participarán algúns dos mellores grupos de baile tradicional de toda Galicia, e que a fin de festa terá un carácter especial xa que actuará o Coro Vales Mahía “e algúns dos seus compoñentes son pais dos rapaces que están no grupo de baile; mesmo a súa directora bailou en Fortín” e reseñou que era unha boa ocasión para darse a coñecer, xa que asistirían numerosas persoas de toda a xeografía galega.
O Concelleiro de Cultura, Matías Rodríguez, destacou a gran calidade deste certame, pola traxectoria de todos os grupos participantes; tamén resaltou a importancia deste tipo actividades culturais “que levan moi lonxe o nome deste concello”.
A Alcaldesa de Silleda, Paula Fernández Pena, deu os parabéns a todos os organizadores de Azaloira, e salientou a importante colaboración que se fai con este concurso dende diferentes sectores “sen a que no sería posible levalo a cabo”. “Asemade, se Azaloira se mantén tras 12 anos, e cada vez con máis forza, é porque se está a facer ben, que que, ademais, en tempos tan duros coma estes, os comerciantes e todos os veciños seguen a colaborar para mantelo vivo”.
A rexedora falou tamén da importante sinerxía que se establece entre os diferentes colectivos ao levar a cabo este tipo de actividades.
Ningún comentario:
Publicar un comentario