Este sábado día 12 de setembro, de 11:00 a 13:30 farase á montaxe final da colcha que se empezou a coser no Festival de Patchwork celebrado en xuño en Area Central. Con este taller quérese facer visible o talante colaborativo do movemento #maker: e é que dúas ducias de cosedores e cosedoras interviñeron na súa composición e moitos máis aportando as pezas dos tecidos. Trátase dunha peza de máis de mil retais compoñendo o logo da Compostela Mini Maker Faire que se exhibirá o día da feira.
A organización da Maker Faire e Area Central convidan a amigos e afeccionados á costura a pasar polo taller aberto e participativo e deixar a súa aportación en forma de pontadas.
A maneira de recordatorio, o día da Compostela Mini Maker Faire, o 17 de outubro, haberá
actividades para todos os gustos e todas as idades: Area Central estará a tope de actividades: charlas, mesas redondas, talleres de manualidades, tecnolóxicos e de aprendizaxe básica de electrónica, robótica e programación, zona de exhibición de proxectos, cortadoras láser, impresoras 3D e moitas sorpresas máis serán as actividades principais desta celebración do movimento maker. Son máis de 70 os expositores confirmados ata o de agora.
Daranse cita creadores de vangarda en campos como a artesanía, a arte urbana, a impresión 3D, a robótica, a música ou a gastronomía.
O obxectivo da Maker Faire Compostela é mostrar unha maneira diferente de concebir a fabricación dos obxectos e o intercambio entre produción, consumo, industria e comercio, tal e como se entende hoxe en día, e terán presenza deseñadores, inventores, artesáns, emprendedores, makers, familias curiosas, comunidades de makers, "facedores", profesionais da manufactura e a artesanía dixital, así como comunidades que comparten de forma aberta as súas experiencias e descubrimentos co público.
Na páxina web http://makerfairecompostela.com/ existe un formulario onde calquera que teña un proxecto e o queira dar a coñecer pódeo presentar e entrar no proceso de selección. Igualmente existe un espazo para que os patrocinadores que o desexen poidan apoiar a Compostela Maker Faire.
Ningún comentario:
Publicar un comentario