Frades - éxito dos rapaces das escolas deportivas municipáis

ÉXITO DOS RAPACES DAS ESCOLAS DEPORTIVAS MUNICIPAIS DE FRADES AO CONSEGUIR 4 MEDALLAS NO CAMPIONATO INTERCOMARCAL DE ATLETISMO

Tres das medallas foron na modalidade de lanzamento de peso

Os rapaces das Escolas Deportivas Municipais de Frades conseguiron un gran éxito no campionato intercomarcal de atletismo en idade escolar “Xogade Santiago-Noia”, disputado esta fin de semana na Pobra do Caramiñal. Os rapaces das escolas deportivas conseguiron catro medallas (1 de ouro, 1 de prata e 2 de bronce) e outros cinco atletas remataron entre os dez primeiros clasificados.

O lanzamento de peso foi a modalidade estrela para os rapaces de Frades, na que lograron 3 medallas. Así, o cadete Xoel Sánchez Costoya conseguiu a medalla de ouro na categoría cadete cun lanzamento de 9,44 metros. Nesta mesma categoría, Manuel Prado Otero acadou a medalla de bronce cun lanzamento de 8.83 metros. E na categoría alevín, Rubén Alvite Ares conseguiu a medalla de bronce cun lanzamento de 6,34 metros.

A cuarta medalla das Escolas Deportivas Municipais de Frades chegou na modalidade dos 80 metros lisos, categoría infantil. Jesús Iglesias Botana logrou a medalla de prata cun tempo de 12,34 segundos. Así mesmo, o cadete Pablo Carnota acadou o 6º posto en lanzamento de peso, polo que tanto el como os catro medallistas clasificáronse automaticamente para o campionato provincial do programa “Xogade”, que se celebrará o vindeiro 4 de maio nun lugar aínda por determinar.

Completaron a boa actuación das Escolas Deportivas Municipais de Frades: Pablo Gómez (9º posto en 60 metros lisos, categoría alevín), Santiago Pérez (7º posto en 50 metros lisos e 8º posto en 500 metros lisos, categoría benxamín), Daniel Carnota (8º posto en salto de lonxitude, categoría cadete) e Gonzalo Sánchez (7º posto en lanzamento de peso, categoría infantil).