Centro de Transfusión - A campaña no clínico acadou 48 doazóns

Un 23% das doazóns de sangue efectuadas entre o mércores 19 e o xoves 20 de novembro, na unidade móbil do CTG desprazada ata as inmediacións do centro sanitario santiagués, correspondéronse con novos doadores

A campaña de doazón de sangue desenvolvida polo Centro de Transfusión de Galicia (CTG), que acolleu o mércores 19 e o xoves 20 de novembro o Hospital Clínico de Santiago, rexistrou un elevado nivel de participación, acadando un total de 48 doazóns de sangue.

Un dato especialmente salientable o constitúe o feito de que o 23% das doazóns rexistradas (11 doazóns), correspondíanse con persoas que doaban sangue por vez primeira. Esta porcentaxe contribúe a acadar un dos principais obxectivos do Centro de Transfusión de Galicia: incrementar a actual base de doadores e doadoras galegos.

Importante participación

Esta visita das unidades móbiles do Centro de Transfusión de Galicia atópase dentro do programa que está a desenvolver a Consellería de Sanidade para achegar o solidario xesto da doazón de sangue a empresas e organismos e institucións públicas e privadas de toda Galicia, xa que este colectivo supón o 8% do total anual de doazóns que recolle o CTG.

Salientar que o CTG ten visitado as instalacións do Hospital Clínico de Santiago un total de doce ocasións, nos transcurso das cales obtivéronse un total de 493 doazóns (77 delas procedentes de persoas que doaban por vez primeira).

O Centro de Transfusión de Galicia quere amosar o seu recoñecemento á Xerencia de Xestión Integrada de Santiago pola súa inestimable colaboración no desenvolvemento das campañas de doazón de sangue, así como a todos os profesionais do Hospital Clínico polo seu compromiso con este xesto solidario, fundamental para o desenvolvemento da rutina asistencial dos nosos centros sanitarios.

Ningún comentario: