O BNG de Teo ante as queixas dos veciños e veciñas de Cacheiras, denuncia que as novas beirarrúas que se incluiron no POS, a proposta do BNG no entorno do IES para mellorar a seguridade viaria, están paradas desde hai varios meses e nun estado que dificulta o desprazamento dos/as peóns, pois seguen sendo cunetas con formigón en bruto. Ademais tamén destacaron que non hai pasos de peóns.
O portavoz do BNG, Manuel Anxo Fernández Baz, considera que o goberno non debe caer na xa clásica dinámica preelectoral de deixar o remate das obras para as semanas previas ás eleccións, senon que debe responder ás necesidades dos veciños e das veciñas, e sobre todo a non xerar máis problemas dos que xa teñen, e máis aínda no que ten a ver coa seguridade viaria.
Polo tanto, o BNG demanda do goberno municipal que execute os acordos e que remate as obras comezadas para que os veciños e veciñas poidan transitar polas escasas beirarrúas que hai no concello.
Ningún comentario:
Publicar un comentario